Келечекке карай: Кыргызстан менен БУУнун өнөктөштүгүнүн жаңы этабы

Бириккен Улуттар Уюму менен Кыргызстандын келечектеги өнөктөштүгү кандай болушу керек? Дал ушул суроо 2027-жылдан кийинки мезгилге карата БУУнун Туруктуу өнүгүү жаатындагы кызматташтык алкагын (UNSDCF) иштеп чыгуу процессинин өзөгүн түзөт. Келечекке багытталган жана ар түрдүү кызыкдар тараптардын кеңири катышуусундагы консультациялык процесстин негизинде түзүлүп жаткан бул Алкак алдыдагы жылдары Кыргыз Республикасынын Министрлер Кабинети менен БУУнун Туруктуу өнүгүү максаттарына жетишүүнү тездетүү үчүн биргелешип кандай иш алып барарын аныктайт.

2026-жылдын май айында Кыргыз Республикасынын Министрлер Кабинети менен БУУ Стратегиялык координациялык комитеттин алкагында жаңы Кызматташтык алкагын иштеп чыгуу боюнча жол картасын биргелешип жактырышкан. Стратегиялык координациялык комитет — эки тараптын кызматташтыгына стратегиялык багыт берүүчү жана аны координациялоочу негизги платформа болуп саналат. Ага Кыргыз Республикасынын Министрлер Кабинетинин Төрагасы жана БУУнун Туруктуу координатору теңтөрагалык кылат.

Алынган сабактарга таянуу

Келечекти пландаштыруудан мурда, процесс буга чейинки тажрыйбага кайрылат. Учурда 2023–2027-жылдарга карата Кызматташтык алкагына көз карандысыз баалоо жүргүзүлүп жатат. Анын алкагында кайсы багыттарда жакшы натыйжаларга жетишилгени, кандай кыйынчылыктар жаралганы жана алардын себептери талданып, алынган сабактар кийинки Кызматташтык алкагын иштеп чыгууда эске алынат жана аны мындан ары күчөтүүгө кызмат кылат.

Далилдүү базаны түзүү

Процесстин өзөгүндө Өлкөлүк талдоо турат — бул Кыргызстандын бүгүнкү абалын комплекстүү баалоого багытталган, маалыматтарга, изилдөөлөргө жана талдоолорго негизделген биргелешкен иш. Ошол эле учурда бул кеңири консультациялык процесс болуп саналат: ал БУУ тутумунун, өнүктүрүү боюнча өнөктөштөрдүн жана ар түрдүү кызыкдар тараптардын көз караштарын жана тажрыйбасын бириктирип, өлкөнүн өнүгүү контексти, жаңы тенденциялар жана артыкчылыктуу багыттар боюнча жалпы түшүнүк калыптандырууга көмөктөшөт.

Консультациялар кызыкдар тараптардын кеңири чөйрөсүнүн көз караштарын камтыйт. Алардын катарына борбордук жана жергиликтүү мамлекеттик органдар, жарандык коом уюмдары, өнүктүрүү боюнча өнөктөштөр, эл аралык каржы институттары, жеке сектор, академиялык чөйрө, жаштар, аялдардын жана адам укуктарын коргоочу уюмдар, майыптыгы бар адамдар, жергиликтүү коомчулуктардын өкүлдөрү жана артта калуу коркунучунда турган топтор кирет. Мындай кеңири катышуу аныкталган артыкчылыктардын өлкөнүн жана анын элинин муктаждыктары менен умтулууларын чагылдыруусуна өбөлгө түзөт.

Далилдерден артыкчылыктарга карай

Топтолгон далилдер, консультациялар жана келечекке багытталган талдоо биргелешкен стратегиялык артыкчылыктарды аныктоо процессинде бириктирилет. Анын алкагында Кыргыз Республикасынын Министрлер Кабинети менен БУУ Кыргызстандын инклюзивдүү социалдык-экономикалык өнүгүүсүн илгерилетүүнүн, Туруктуу өнүгүү максаттарына жетишүүнү тездетүүнүн жана адамдардын жашоо сапатын жакшыртуунун негизги багыттарын аныкташат.

Алдыда эмне күтөт

Андан соң документти иштеп чыгуу этабы башталат: биргелешип аныкталган артыкчылыктар конкреттүү күтүлүүчү натыйжаларды жана натыйжалар алкагын камтыган Кызматташтык алкагына айландырылат. Ал биргелешкен аракеттерге багыт берип, жоопкерчиликти күчөтүүгө кызмат кылат.

Жаңы UNSDCF 2027-жылдын ортосуна чейин жыйынтыкталат деп күтүлүүдө. Ал Кыргызстан менен Бириккен Улуттар Уюмунун отуз жылдан ашуун убакыттан берки өнөктөштүгүнө таянып, кызматташтыктын кийинки этабы үчүн негиз түзөт.

Процесстин ар бир этабы бул өнөктөштүктүн далилдерге, келечекти алдын ала баалоого жана ал кызмат кылууга багытталган адамдардын артыкчылыктарына негизделишин камсыз кылууга багытталган.