Кыргыз Республикасы табигый кырсыктардын алдын алуу, даярдыкты камсыз кылуу жана чара көрүү боюнча чечимдерди кабыл алууну жакшыртуу үчүн табигый кырсыктардын тобокелдиктерин баалоо моделин сынап көрдү
05 июнь 2025
Швейцария өкмөтүнүн колдоосу менен Кыргыз Республикасынын Өзгөчө кырдаалдар министрлиги жана БУУнун Дүйнөлүк азык-түлүк программасы (БУУ ДАТП) жер-жерлерде табигый кырсыктардын тобокелдигине баа берүү инструменти болгон INFORM моделин ийгиликтүү сыноодон өткөрдү. Табигый кырсыктарга даярдыкты жогорулатуу, аларга чара көрүү жана тобокелдиктерди азайтуу боюнча демилге улуттук системаларды бекемдеп, келечектеги өзгөчө кырдаалдар учурунда стратегиялык пландаштырууну өркүндөтөт.
Пилоттук долбоордун жүрүшүндө жергиликтүү маалыматтык модель Жалал-Абад облусунун Сузак районунда, өлкөнүн табигый кырсыктарга эң көп дуушар болгон регионунда райондук деңгээлде колдонулду. Бардык 13 айыл өкмөтүн камтуу менен, бул модель 300 000ден ашуун тургундар үчүн табигый кырсыктардын тобокелдиги жөнүндө жалпы көрүнүшүн камсыз кылды.
INFORM модели табигый кырсыктарды натыйжалуу башкаруу үчүн бекем негиз түзүп, Сузак районундагы мүмкүн болуучу кырсыктар боюнча толук маалыматтарды берет. Илимий тобокелдиктерди баалоону колдонуп, бул курал ресурстарды талап кылган артыкчылыктуу багыттарды аныктап, маалыматтуу чечим кабыл алууга жардам берет. Бул көптөгөн кызыкдар тараптарга гуманитардык өзгөчө кырдаалдарды болжолдоо, кесепеттерин азайтуу жана даярдыкты координациялоого мүмкүнчүлүк берет.
Кыргыз Республикасынын Өкмөтү INFORM моделин жергиликтүү колдонуунун натыйжаларын колдоп, анын натыйжалуулугун белгиледи. Азыркы учурда табигый кырсыктардын тобокелдиктерин башкарууну күчөтүү үчүн бул механизмди кеңейтүү жана андан ары өркүндөтүү боюнча пландар иштелип жатат.
Алмаз Чороев
Бул демилгеге катышкан БУУ агенттиктери
Бул демилге аркылуу биз колдогон максаттар
