Кыргыз Республикасы азык-түлүк тутумдарын өнүктүрүү үчүн кызыкдар тараптарды бириктирүүдө

Азык-түлүк тутумдарынын туруктуулугун чыңдоо максатында, Кыргыз Республикасынын Суу ресурстары, айыл чарба жана кайра иштетүү өнөр жайы министрлиги (Министрлик) азык-түлүк тутумдары боюнча диалог уюштуруп, жеке жана мамлекеттик секторлордун өкүлдөрүн бириктирди. Бул иш-чара БУУнун Азык-түлүк тутумдары боюнча Координациялык борборунун колдоосу менен 2024-жылдын 15-ноябрында Hyatt мейманканасында өттү.

Министрлик, БУУнун Туруктуу координаторунун кеңсеси, БУУнун Дүйнөлүк азык-түлүк программасы (БУУ ДАТП), Азык-түлүк жана айыл чарба уюму (ФАО) жана ЮНИСЕФтин колдоосу менен уюштурулган бул форум азык-түлүк тутумдарын трансформациялоо боюнча инклюзивдүү аянтча болуп саналат. Жеке сектордун өкүлдөрү, мамлекеттик кызматкерлер жана башка кызыкдар тараптар Улуттук азык-түлүк коопсуздугу жана тамактануу программасында белгиленген стратегиялык көз карашты талкуулап, 2030-жылга карата туруктуу азык-түлүк тутумдарын өнүктүрүү багытында сөз кылышты. Ошондой эле, диалог пайдалуу тамактануу маселелерин көтөрүп, Министрликтин ачык-айкындуулук саясатын бекемдеди.

Азык-түлүк тутумдары боюнча диалог камсыздоо чынжырынын бардык этаптарында – өндүрүштөн жана кайра иштетүүдөн тарта, сактоо жана сатууга чейинки көйгөйлөрдү аныктоого жана чечүүгө багытталды. Андан тышкары, катышуучулар туруктуу азык-түлүк тутумдарын түзүүдө мамлекет менен ишкерлердин ролун, сапаттуу азык-түлүккө жеткиликтүүлүктү жакшыртуу, калктын саламаттыгын чыңдоо, ошондой эле Кыргыз Республикасында азык-түлүк коопсуздугун жана пайдалуу тамактанууну камсыз кылуу боюнча маселелерди талкуулашты.

Бул диалогдун алдында Министрлик аймактарда эки «Агродиалог» уюштуруп, аларга дыйкандар, кайра иштетүү тармагынын өкүлдөрү, илимпоздор жана өндүрүүчүлөр сыяктуу ар башка секторлордун миңден ашуун өкүлдөрү катышкан. Мындай иш-чаралар БУУнун Туруктуу өнүгүү максаттарына (ТӨМ) шайкеш келген айыл чарба тармагынын узак мөөнөттүү максаттарын түзүүдө маанилүү роль ойнойт.

Кыргыз Республикасы 2021-жылы БУУнун азык-түлүк тутумдары боюнча саммитине активдүү катышып, 2030-жылга карата туруктуу азык-түлүк тутумдары боюнча өзүнүн стратегиялык көз карашын сунуштаган. 2023-жылы БУУнун Дүйнөлүк азык-түлүк программасы, ЮНИСЕФ жана ФАОнун колдоосу менен Министрлик азык-түлүк коопсуздугун камсыз кылууга багытталган беш жылдык көп секторлуу программаны иштеп чыккан. Бул программа ар башка министрликтердин жана секторлордун аракеттерин бириктирип, өлкөнүн азык-түлүк тутумдарын өнүктүрүү үчүн комплекстүү жана көп тараптуу иш-аракеттер керек экенин баса белгилейт.