БУУ жана Кыргызстан БУУнун 80 жылдыгын белгилешүүдө — «Тынчтык, өнүгүү жана адам укуктары үчүн биргеликте!»

Бул майрамдык иш-чара улуттук жана эл аралык өнөктөштөрдү — жогорку мамлекеттик жетекчилерди, парламент өкүлдөрүн, жарандык коомду, жаштарды, медиа өкүлдөрүн, эл аралык уюмдарды жана БУУ кызматкерлерин бир аянтчага чогултуп, Кыргызстан менен Бириккен Улуттар Уюмунун тынчтыкты, туруктуу өнүгүүнү жана адам укуктарын илгерилетүүгө болгон жалпы жана туруктуу умтулуусун дагы бир жолу бекем тастыктады.

Өзүнүн ачылыш сөзүндө БУУнун Кыргызстандагы Туруктуу координатору Антье Граве айым глобалдык жана улуттук чакырыктарды чечүүдө диалогдун жана өнөктөштүктүн маанилүүлүгүн баса белгиледи:

«Бүгүнкү 80 комузчудан турган оркестр сыяктуу эле, Бириккен Улуттар Уюму ар түрдүү үндөрдү — ар бири өзүнүн обону жана ритми менен — бириктирип, жалпы максат үчүн чогуу ойногондо шайкештик жарата алат. Бул — Бириккен Улуттар Уюмунун жана көп тараптуу кызматташтыктын чыныгы маңызы: ар түрдүүлүктөгү биримдик жана кызматташтыктан келген күч», — деп билдирди Антье Граве айым.

Иш-чарада Кыргыз Республикасынын Тышкы иштер министри Жээнбек Кулубаев мырза сөз сүйлөдү. Өзүнүн кайрылуусунда министр кыргыз дипломатиясынын тарыхы Бириккен Улуттар Уюмунун тарыхы менен тыгыз байланышта экенин, экөөнү тең тынчтыкка, өнүгүүгө жана эл аралык кызматташтыкка кызмат кылуу деген жалпы максат бириктирип турганын баса белгиледи.

«Өткөн жылы биз дипломатиялык кызматтын 80 жылдык мааракесин белгиледик. Анын БУУ менен бир эле күнү негизделиши — бул жөн гана кокустук эмес. Кыргызстан БУУ менен чогуу татаал жолдон өттү — карама-каршылыктар менен чакырыктарды, калыптануу жана чыңалуу мезгилдерин баштан кечирди. Айрым учурларда кең, кээде болсо тар жолдор менен өнүгүү жолунда алдыга жылдык», — деди Жээнбек Кулубаев мырза.

Ачылыш сөздөрүнөн кийин «БУУга 80 жыл: өзгөрүп жаткан дүйнөдөгү өнөктөштүк жана максаттар» темасында панелдик талкуу өткөрүлдү. Талкууга жарандык коомдун жана эксперттик чөйрөнүн өкүлдөрү катышты.

Ошондой эле «БУУ айылы» аттуу көргөзмө уюштурулуп, Кыргызстанда иш алып барган 27 БУУ агенттигинин төрт багыттагы — Тынчтык, Өнүгүү, Адам укуктары жана Гендердик теңдик — ишмердүүлүгү көрсөтүлдү. Бул көргөзмө БУУ менен анын өнөктөштөрүнүн Кыргызстанда Туруктуу өнүгүү максаттарына жетүү жолундагы биргелешкен аракеттерин чагылдырды. 

Маалымат катары
БУУ күнү 1945-жылдын 24-октябрында Бириккен Улуттар Уюмунун Уставы күчүнө кирген күндүн жылдыгына арналган дата болуп саналат. 80 жыл аралыгында бул Устав дүйнө жүзүндө тынчтыкты, туруктуу өнүгүүнү жана адам укуктарын илгерилетүү боюнча жалпы аракеттерге жол көрсөтүп келүүдө.

Кыргызстан 1992-жылдын 2-мартында Бириккен Улуттар Уюмунун мүчөсү болуп кабыл алынган, ал эми 1993-жылы өлкөдө БУУнун туруктуу өкүлчүлүгү ачылган.